ChatGPT Images 2.5: хутчэй, дакладней і ўжо са скетчамі

OpenAI выпусціла ChatGPT Images 2.5 — новую мадэль для генерацыі і рэдагавання выяваў. Яна стварае карцінкі да 50% хутчэй за папярэднюю версію, лепш працуе са святлом і тэкстурамі, а таксама дакладней захоўвае людзей і аб’екты з рэферэнсных фота.

Галоўнае — больш дакладнае рэдагаванне. Можна змяніць толькі патрэбны элемент: тэкст, фон або прадмет, не ламаючы астатнюю кампазіцыю. На доўгай серыі правак мадэль таксама лепш трымае кантэкст і не так хутка дэградуе вынік.

У ChatGPT з’явіўся Sketch: можна намаляваць накід проста ў чаце — план пакоя, сілуэт адзення ці каракулі — і папрасіць ператварыць яго ў гатовую выяву. Дадалі шаблоны для папулярных фарматаў, каментары непасрэдна на выявах і магчымасць дзяліцца промптамі.

Для API выйшлі дзве мадэлі. GPT-Image-2.5 Flare — хуткая версія для масавай генерацыі. GPT-Image-2.5 Sunburst — для дэталёвай камерцыйнай графікі і больш кантраляванага рэдагавання.

Images 2.5 ужо паступова даступная карыстальнікам ChatGPT, ChatGPT Work і Codex на мабільных прыладах, у вэбе і на дэсктопе.

Крыніца: OpenAI